Halyeeygii hore ee Manchester United, Roy Keane, ayaa sheegay in Michael Carrick iyo shaqaalihiisa tababarka ay nasiib leeyihiin in weli loo oggolaaday inay kooxda sii hoggaamiyaan.
“Markii shaqada loo dhiibay sannadkii hore, waxaan bilowgii horeba sheegnay inaanan u arkin tababare muddo dheer ku habboon kooxda,” ayuu Keane ka yiri barnaamijka The Overlap.
Wuxuu sheegay in maareynta dhowr kulan ay ka duwan tahay hoggaaminta koox weyn, maadaama ay jiraan mas’uuliyado dheeraad ah sida diyaarinta xilli ciyaareedka, filashada taageerayaasha iyo suuqa kala iibsiga.
Keane ayaa sidoo kale dhaliilay dadka natiijooyinka wanaagsan ku taageerayay in Carrick loo dhiibo shaqada joogtada ah, balse hadda guuldarrooyinka ku eedeynaya maamulka iyo agaasimaha ciyaaraha Jason Wilcox.
“Michael Carrick, shaqaalihiisa tababarka, Jonny Evans, Jonathan Woodgate iyo Steve Holland waa dad nasiib badan oo weli Manchester United jooga. Waa inay dhiirranaan muujiyaan oo ay Sabtida natiijo keenaan. Waa inay Chelsea ka helaan guul,” ayuu yiri.
Wararka ayaa sheegaya in United ay qorsheysay inay Carrick shaqada ka ceyriso kaddib guuldarradii 3-0 ahayd ee Bournemouth, balse maamulka ayaa shaki ka qabay musharraxiintii lagu beddeli lahaa.
Sidaas darteed, Carrick ayaa loo oggolaaday inuu hoggaamiyo kooxda kulanka Sabtida ay Chelsea la ciyaarayaan.
