Tababaraha Paris Saint-Germain, Luis Enrique, ayaa muujiyay sida uusan ugu qanacsanayn kaalinta 14-aad ee Vitinha uu ka galay abaalmarinta Ballon d’Or 2026, isagoo aaminsan in xiddiga khadka dhexe ee reer Portugal uu u qalmay boos ka sarreeyo kaas.
Vitinha ayaa kaalinta 14-aad ka galay codbixintii ugu dambeysay, inkastoo uu door muhiim ah ka qaatay guushii PSG ee Champions League, taasoo kooxda u suuragelisay inay markii labaad oo xiriir ah ku guuleysato koobka.
26-jirkan ayaa sannadkii hore kaalinta saddexaad galay, balse sanadkan wuxuu hoos ugu dhacay 14-aad. Wuxuu sidoo kale ka dambeeyay saaxiibkiisa Achraf Hakimi oo galay kaalinta 13-aad.
Isagoo ka hadlayay shir jaraa’id, Enrique ayaa ammaanay tayada iyo doorka Vitinha.
“Waan naqaannaa, sidaas darteed lama yaabeyno. Waa farxad weyn inaan haysanno ciyaaryahan leh awood farsamo iyo mid jireed oo heerkan ah,” ayuu yiri.
Wuxuu intaas ku daray in Vitinha uu leeyahay tayo aan caadi ahayn, isla markaana uu u qalmay qiimeyn ka wanaagsan tii uu ka helay Ballon d’Or.
PSG ayaa ciyaartoy dhowr ah ku yeelatay 10-ka sare. Khvicha Kvaratskhelia wuxuu galay kaalinta lixaad, Ousmane Dembélé toddobaad, halka Fabián Ruiz uu galay kaalinta 10-aad.
Si kastaba, kooxdu ma aysan helin ciyaaryahan ka mid noqda shanta ugu sarreysa sanadkan. PSG ayaa sidoo kale markii labaad oo xiriir ah ku guuleysatay abaalmarinta Kooxda Sanadka.
