Weeraryahankii hore ee kooxda Manchester United, Wayne Rooney, ayaa shaaca ka qaaday inuu ku fikiray mar inuu is-dilo xilli uu ku jiray halkii ugu sarreysay ee xirfaddiisa ciyaareed. Halyeeygan reer England ayaa xusay inuu ku raaxaysan jiray gudaha garoonka, balse uu ku dhibtooday dhinac kasta oo kale oo noloshiisa ah.
Isagoo ka hadlayay barnaamijka Life At The Midpoint ee ay daadihiso Gabby Logan, 41 jirkan ayaa sharraxay in marxaladdan adag ay bilaabatay wax yar ka dib markii uu guursaday xaaskiisa Coleen isla markaana uu aabbe u noqday curadkiisa Kai. Wuxuu qiray inuu guriga ku cabbi jiray khamriga muddo laba maalmood oo xiriir ah ka hor inta uusan u kicin tababarka.
Rooney, oo ah gool-dhaliyaha ugu sarreeya taariikhda Manchester United isagoo u dhaliyay 253 gool 559 kulan oo uu saftay, ayaa tilmaamay inuu is-qarin jiray si uusan wiilkiisa Kai ugu arkin xaaladdaas.
“Waxaan gaaray heer aan ka fikiro inaan is-dilo. Ma aanan doonayn inaan cidna la joogo, ma rabin inaan dadka ku arko waddooyinka ama aan galo dukaamada. Ma doonaysid inaad muujiso wax daciifnimo ah, sidaas darteed waxaad isku dayaysaa inaad is-qariso,” ayuu yiri Rooney.
Wuxuu intaas ku daray inuu la hadlay dhakhtar dhanka maskaxda ah si uu u fahmo waxa ka qaldan, maadaama waqtigaas oo ay ahayd inuu noqdo kan ugu farxadda badan noloshiisa, inkastoo uu noqday kii ugu hooseeyay ficillada anaaniyadda ah ee uu samaynayay awgood.
Ugu dambeyn, Rooney ayaa ammaan weyn u jeediyay xaaskiisa Coleen oo ka caawisay inuu ka gudbo marxaladdaas adag, isagoo qirtay in xaaladdu ay aad u xumayd ilaa heer ay isaga tagi gaartay, balse ay dooratay inay garab istaagto.