Kabtanka kooxda Liverpool, Virgil van Dijk, ayaa qiray in kooxdiisu ay tahay inay iska hagaajiso dhanka daafaca, ka dib guul-darradii 3-2 ahayd ee ka soo gaartay Fenerbahce.
Guul-darradan ayaa ahayd kulankii saddexaad oo xiriir ah oo tartanka Champions League ah oo Liverpool laga dhaliyo saddex gool. Inkastoo ay goolal badan ku qariyeen dhibaatada daafacooda kulamadii ay ka badiyeen LASK iyo Villarreal, haddana Arbacadii way awoodi waayeen inay sidaas sameeyaan.
“Xaaladdan ma ahan mid lagu sii socon karo,” ayuu yiri Van Dijk. Wuxuu xusay inuu ahaa habeen aad looga niyad-jabo, gaar ahaan qaabka fudud ee looga dhaliyay goolasha, isagoo intaas ku daray inay u taallo shaqo badan. Wuxuu tilmaamay in saddexda goolba ay ka dhasheen kubbado la dhigay, taas oo ay xilli-ciyaareedkan ku wanaagsanaayeen balse ay kulankan lumiyeen feejignaantii, ayna ku adag tahay in la aqbalo.
Van Dijk ayaa sheegay in natiijadu ay ka caraysiisay balse uusan muujin maadaama ciyaartoyda oo dhan ay si weyn u niyad-jabsanaayeen. “Ma ahan inaan ku guul-darraysannay qaabkii aan u ciyaareynay, balse way dhacday, Fenerbahce ayaana sidoo kale mudan ammaanta,” ayuu hadalkiisa ku soo xiray.
