Taageerayaasha Liverpool ayaa si weyn u dhaliilay daafaca bidix ee Kostas Tsimikas kadib guuldarradii 3-2 ahayd ee kooxdooda kala kulantay Fenerbahçe tartanka Champions League.
Liverpool ayaa kulanka soo gashay iyadoo saddexdii kulan ee hore ee tartanka wada guuleysatay, waxayna hoggaanka qabatay daqiiqaddii 25-aad, markii Trey Nyoni oo 19 jir ah uu dhaliyay gool qurux badan. Wuxuu noqday ciyaaryahankii labaad ee ugu da’da yaraa ee Liverpool gool u dhaliya Champions League.
Mason Greenwood ayaa afar daqiiqo kadib barbaraha u keenay Fenerbahçe, iyadoo laadkiisii xorta ahaa uu leexday. Alexander Isak ayaa qeybtii labaad hoggaanka dib ugu soo celiyay Liverpool, balse Archie Brown ayaa daqiiqaddii 73-aad barbaraha dhaliyay, kadibna caawiyay goolkii guusha ee Vedat Muriqi.
Tsimikas, oo ahaa daafaca bidix ee Liverpool, ayaa si weyn ugu dhibtooday kulanka, waxaana weerarrada Greenwood ay ku noqdeen madax-xanuun. Wuxuu sidoo kale ku sigtay in rigoore laga dhigo kadib markii uu gudaha xerada ganaaxa ku riixay Greenwood.
30-jirkan ma uusan sameyn wax taakal ah 76-kii daqiiqo ee uu ciyaarta ku jiray, wuxuuna lumiyay kubadda siddeed jeer ka hor inta aan lagu beddelin Milos Kerkez.
Taageerayaal badan ayaa baraha bulshada ku dalbaday inuusan mar dambe kooxda u ciyaarin, iyagoo sidoo kale su’aal geliyay sababta Andy Robertson loo fasaxay halka Tsimikas la sii haystay.
Dhaleeceyntaas waxay muujisay sida ay taageerayaashu uga caroodeen bandhiggiisa kulankaas.
