Victor Osimhen wuu go’aansaday! Weeraryahanka la baadi-goobayo oo qorshe cusub la yimid, iyadoo Man Utd, Chelsea iyo Arsenal ay doonayaan xiddiga Galatasaray.
Victor Osimhen ayaa la soo sheegaya inuu go’aansaday inuu u dhaqaaqo Premier League ama uu ku biiro Juventus marka uu dhammaado amaahdiisa kooxda Galatasaray.
Xiddiga xulka qaranka Nigeria ayaa haatan amaah ugu jooga Galatasaray ilaa dhammaadka xilli ciyaareedkan, balse waxaa la filayaa inuu si rasmi ah uga tago Napoli xagaagan. Warbixin ay baahisay ESPN ayaa sheegtay in 26-jirkan uu doorbidayo inuu u wareego England ama Juventus.
Warbixinta ayaa sidoo kale sheegtay in kooxaha Premier League ee Manchester United, Arsenal, iyo Chelsea ay ka mid yihiin kooxaha doonaya weeraryahan cusub xilli ciyaareedka dambe, iyadoo Osimhen uu muddo dheer kusoo jiray liiska ay xiiseynayaan.
Weeraryahanka goolasha badan dhaliya ayaa la rumeysan yahay inuu ku kacayo £55.6 milyan ($71m) xagaagan.
ESPN waxay sheegtay in Manchester United ay hadda mudnaan siinayso weeraryahanka kooxda Ipswich Town ee Liam Delap, sababtoo ah mushaarkiisa oo ka hooseeya kan Osimhen. Sidoo kale, 22-jirkan ayaa la filayaa in lagu heli karo qiyaastii £40 milyan ($51.1m) haddii Ipswich ay hoos ugu dhacdo heerka labaad (Championship).
