Xiddigii hore ee Manchester United, Paul Parker, ayaa ku tilmaamay saxiixa Mason Mount mid ka mid ah “saxiixyada ugu xun” taariikhda kubadda cagta.
Parker ayaa sheegay in Mount uusan ku fiicnayn Chelsea, sidoo kalena uu musiibo ku noqday Manchester United.
Xiddigii hore ee Premier League ayaa u sheegay SpilXperten in United ay qalad weyn samaysay markii ay xiddiga xulka England kala soo wareegtay Chelsea.
Dhab ahaantii, Mount inta badan dhaawac ayuu ku maqnaa tan iyo markii uu Stamford Bridge kaga soo dhaqaaqay Old Trafford.
Parker wuxuu aaminsan yahay in Chelsea ay faa’iido badan ka heshay iibinta xiddigan.
Wuxuu yiri: “Mason Mount waa mid ka mid ah saxiixyada ugu xun abid. Sida, taariikhda kubadda cagta. Waa musiibo dhab ah.
“Waa masiibo, wuxuuna sidaas oo kale ku ahaa Chelsea, sidaas darteed ma fahmi karo sababta Man United ay u keentay.
“Had iyo jeer waxaan iri ma garanayo booskiisa saxda ah. Ma garanayo waxa uu ku fiican yahay, xitaa isaga laftiisu ma garanayo.
“Dabcan, waa wax laga xumaado in mar walba uu dhaawac ku maqnaado, balse… Miyuu dhab ahaan dhaawacan yahay? Ma garanayo, laakiin waxa uu u muuqdaa mid si fudud uga baxa qaab ciyaareed wanaagsan ama doonayn inuu ciyaaro.
“Waan hubaa inuu yahay wiil wanaagsan, boqolkiiba boqol, laakiin heerka uu joogo ma ahan mid u qalma Manchester United, waana ogahay inuusan kaliya ahayn dhibaatada kaliya ee kooxda heysata.
“Wuxuu xitaa noqon waayey dhibaatada ugu weyn, balse ma caawinayo kooxda xitaa haddii uu ciyaarayo ama uusan ciyaarayn. Waxaan rajeynayaa in kooxda iyo isaga ay xal u helaan arrintan maxaa yeelay taasi waxay noqon doontaa waxa ugu wanaagsan ee la sameyn karo.
“Chelsea aad bay ugu faraxsan tahay inay iska iibisay. Way ka caawiyeen dhanka dhaqaale, balse intaas kaliya ma ahan, waxay heleen ciyaartoy badan oo aanan kaliya hal heer ka sarreynin isaga, balse heerar badan ka sarreeya.”
Mount ayaa ka tegay Chelsea, oo ahayd kooxda uu ku soo barbaaray, kuna biiray Manchester United sanadkii 2023.
Xiddigan khadka dhexe ayaa seegay 49 kulan oo Man United ah sababo la xiriira dhaawacyo.
Wuxuu heystaa hal gool oo uu u dhaliyay Red Devils 32 kulan uu u ciyaaray, goolkaasoo yimid kulankii ay 1-1 la galeen Brentford.
