Liverpool ayaa laga yaabaa inay iska dirto Federico Chiesa iyo Wataru Endo, iyadoo mustaqbalka labada ciyaaryahan ee kooxda uu mugdi ku jiro xilli uu kooxda hoggaaminayo Iraola.
Xaaladda Endo ayaa si gaar ah u adag. Xiddiga Khadka dhexe ee reer Japan ayaa 32 kulan u saftay Liverpool xilli ciyaareedkii ay ku guuleysatay horyaalka, xilligii Arne Slot, balse fursadihiisa ciyaareed ayaa yaraaday xilli ciyaareedkii xigay.
Dhaawac cagta ah oo soo gaaray bishii Febraayo, xilli uu ka ciyaarayay daafaca midig, ayaa garoomada ka saaray muddo saddex bilood ah. Dhaawacaasi wuxuu sidoo kale ka hor istaagay inuu Japan uga qeyb galo Koobka Adduunka 2026.
Iraola ayaa hore u sheegay in Endo uu heli doono fursado, balse wuxuu qiray in Ryan Gravenberch, Alexis Mac Allister, Dominik Szoboszlai iyo Trey Nyoni ay hadda kaga horreeyaan tartanka boosaska khadka dhexe.
Endo iyo Chiesa midkoodna laguma darin liiska Liverpool ee Champions League xilli ciyaareedkan, iyadoo fursado la siiyay da’yarta Lewis Koumas iyo Nyoni.
Sida uu qoray Liverpool ECHO, Endo ayaa la filayaa inuu kooxda ka tago sanadka 2027 marka qandaraaskiisu dhammaado.
Dhanka Chiesa, qandaraaskiisu wuxuu dhacayaa 2028, balse Liverpool ayaa ka fiirsan karta inay iibiso bisha Janaayo haddii ay hesho dalab ku habboon.
Labada ciyaaryahan waxay muujiyeen tayadooda markii fursad la siiyay, hase yeeshee ciyaar-yaraantooda ayaa muujineysa in waayahoodii Anfield uu soo dhammaaday.
