Xiddigii hore ee Chelsea, Joe Cole, ayaa saadaaliyay kulanka ay Arsenal la ciyaari doonto Real Madrid wareega siddeed dhammaadka UEFA Champions League.
Labada kooxood ee Arsenal iyo Real Madrid ayaa xaqiijiyay boosaskooda siddeed dhammaadka habeenkii Arbacada.
Arsenal waxay guul weyn ka gaartay PSV iyagoo isku darka labada lugood ku badiyay 9-3.
Dhanka kale, Real Madrid waxay rigoorayaal kaga reebtay Atletico Madrid si ay ugu gudubto wareegan xiga.
Hadda, Arsenal iyo Real Madrid ayaa isku wajahaya wareega siddeed dhammaadka Champions League bisha soo socota.
Si kastaba ha ahaatee, Cole wuxuu aaminsan yahay in kooxda Mikel Arteta ay awood u leedahay inay garaacdo koox kasta, oo ay ku jirto Real Madrid, labada lugoodba.
Isagoo la hadlayay TNT Sports kaddib barbarihii 2-2 ee Arsenal la gashay PSV, Cole wuxuu yiri:
“Kooxdan iyo naadigan (Arsenal) waxay garaaci karaan qof kasta labada lugoodba.”
“Waxaa haatan ka muuqda daldaloolo badan, ma haystaan weeraryahan caadi ah, dhaawacyo badan ayaa haysta. Laakiin mararka qaar taasi waxay noqotaa dhiirigelin.”
“Mararka qaar wax ayaa si lama filaan ah isugu hagaaga, fursad ayaana abuurmaysa, markaasay yiraahdaan, ‘Saaxibayaal, fursad dahabi ah baa na hor taalla’.”
Arsenal weligeed ma aysan ku guuleysan Champions League taariikhdeeda.
Dhanka kale, Real Madrid waa kooxda ugu guulaha badan tartanka, iyagoo ku guuleystay 15 koob oo Champions League ah.
