Kooxda Manchester United ayaa diyaarisay liis ka kooban saddex ciyaaryahan oo ay doonayso inay laba ka mid ah la soo wareegto suuqa kala iibsiga ee bisha Janaayo, si ay u xoojiso daafaceeda iyo weerarkeeda.
United oo xagaagii dhaqaale badan ku bixisay khadka dhexe ka dib markii ay la soo wareegtay Andrey Santos, Carlos Baleba iyo Youri Tielemans, ayaa xilli-ciyaareedkan ku dhibtoonaysa horyaalka iyadoo isku dhibco ay yihiin Crystal Palace oo ku jirta kaalinta 18-aad ee khadka cas.
Sida uu ku warramay wargeyska The Sun, Manchester United ayaa dhanka daafaca bidix ku raad-joogta Rayan Ait-Nouri oo ka tirsan Manchester City iyo Tyrick Mitchell oo u ciyaara Crystal Palace, kaas oo qandaraaskiisu dhammaanayo dhammaadka xilli-ciyaareedkan laguna heli karo qiimo jaban.
Dhanka weerarka, waxay beegsanayaan weeraryahanka Fulham ee Rodrigo Muniz, oo horey amaah uga soo hoos ciyaaray tababare Michael Carrick waqtigii Middlesbrough, si uu u buuxiyo booska Benjamin Sesko oo dhaawacan iyo Joshua Zirkzee oo la filayo inuu baxo.
Dhanka kale, halyeeygii hore ee kooxda, Paul Scholes, ayaa sheegay in haddii uu awoodo uu United u soo iibin lahaa shanta xiddig ee kala ah Gabriel Magalhaes, Jude Bellingham, Michael Olise, Kylian Mbappe iyo Declan Rice si ay kooxda u badbaadiyaan. Saaxiibkiisii hore Nicky Butt ayaa isaguna xushay Gabriel, Harry Kane, Declan Rice, Lamine Yamal iyo daafaca Newcastle United ee Lewis Hall.
