Xiddiga khadka dhexe ee kooxda Barcelona, Fermín Lopez, ayaa ku tilmaamay Lamine Yamal, ciyaaryahanka ugu fiican adduunka, isagoo sharraxay sida saaxiibtinimadooda ay uga caawisay inay is-faham xooggan ku yeeshaan kooxda dhexdeeda.
Laacibkan 23 jirka ah oo dhowaan saftay kulankiisii 150-aad ee kooxda koowaad, ayaa aaminsan in aqoonta uu Yamal u lahaa tan iyo yaraantoodii ay ka dhigtay xiriirkooda garoonka dhexdiisa mid aad u adag.
Fermín oo la hadlayay wargeyska Mundo Deportivo ayaa sheegay inuu aad ugu faraxsan yahay in Yamal uu ku dareemo raaxo kooxda marka uu isaga ka garab ciyaarayo, wuxuuna yiri: “Wax weyn ayay iiga dhigan tahay sababtoo ah aniga ahaan isagu waa kan ugu fiican. Xaqiiqda ah inuu igu qanacsan yahay ciyaaryahan ahaan, iyo inaan leenahay is-fahamkaas iyo xiriirkaas, waxay muhiim u tahay aniga iyo kooxdaba.
Lamine waxaan is-naqaannay tan iyo yaraanteennii, marka aad saaxiib ku tihiin garoonka dibaddiisa, waxaad yeelanaysaan is-fahamkaas, waxayna ka sii fududaanaysaa garoonka dhexdiisa. Si buuxda ayaad isu taqaannaan, waxaana aaminsanahay in aniga iyo isagu aan boqolkiiba boqol is-fahansannahay.
Waana waxa aan isku dayno inaan garoonka ku samayno, aad ayaana ugu faraxsanahay inaan la ciyaaro sababtoo ah, haddii aan runta sheego, waa kan ugu fiican.”
