Weeraryahanka reer France ee Kylian Mbappe ayaa afka furtay, waxaana uu ka hadlay heshiiska la sheegay inuu la gaadhay Real Madrid oo illaa maanta ay adduunyadu ka sheekaynaysay, waxaanay xogtu sheegaysay inuu si xor ah ugu biirayo Los Blancos xagaaga.
Wargeyska Foot Mercato ayaa maanta soo bandhigay xogta heshiiska Kylian Mbappe iyo Real Madrid, laakiin 25 jirkan ayaa beeniyey in uu wax heshiis ah dhax-maray Real Madrid.
Kylian Mbappe oo la hadla wargeyska RMC Sport ayaa waxa uu sheegay in aanu wax heshiis ah la gaadhin Real Madrid, sidoo kalena aanu illaa hadda go’aan ka gaadhin mustaqbalkiisa.
RMC Sports oo soo xiganaya Kylian Mbappe ayaa yidhi: “Ma jiro heshiis laga gaadhay mustaqbalka Kylian, mana jirto cid uu kala hadlay arrintan. Nooc kasta oo ay noqotaba, wax saamayn ah arrintan la waqtiyeeyey kuma yeelanayso, fikirkiisa iyo go’aankiisa.”
Dhinaca kale, wargeysyada The Athletic iyo L’Equipe ayaa sheegay in PSG ay rajaynayso inay qandaraas cusub la gaadhi doonto Mbappe oo ay sii haysan doonto.
