Cristiano Ronaldo ayaa ku dhawaaqay inuu ka fariistay ciyaaraha caalamiga ah ee xulka qaranka Portugal, ka dib 23 sano oo uu qarankiisa u soo ciyaarayay tan iyo bishii Agoosto 2003-dii, muddadaas oo uu dhigay rikoorro badan isagoo ahaa kabtanka kooxda.
Ronaldo ayaa go’aankan ku shaaciyay barahiisa bulshada, isagoo xaqiijiyay in la gaaray waqtigii funaanadda lambarka 7-aad lagu wareejin lahaa jiilka cusub.
“Maanta waa maalintii aan funaanadda lambarka 7-aad u celin lahaa qof walba. Weligey ma dareemin inay aniga oo keliya ii gaar tahay, balse sharaf iyo mas’uuliyad ayay ii ahayd inaan xirto oo aan difaaco muddo 23 sano ah,” ayuu yiri Ronaldo.
Wuxuu xusay in go’aanku uusan sahlanayn, uuna xusuusto malaayiinta shacabka iyo qurba-joogta reer Portugal ee kubadda cagtu isu soo dhoweysay, halkii uu ka xusuusan lahaa oo keliya goolasha iyo koobabka.
Ronaldo ayaa sheegay inuu wax walba u huray funaanaddan, inkastoo ay jireen guulo aan la ilaawi karin iyo guul-darrooyin xanuun badan. “Khaladaad waan sameeyay waana dhibtooday, balse weligey ma quusan,” ayuu yiri, isagoo hadalkiisa ku soo xiray in goolasha iyo koobabku ay tagaan, balse booska lagu yeesho quluubta dadka uusan waqtigu weligiis tirtiri karin.
