Kooxda Barcelona ayaa iska xaadirisay wareega semi-finalka Champions League iyadoo guuldarro 3-1 ah kala kulantay Borussia Dortmund kulankii lugta labaad, balse guushii 4-0 ahayd ee ay ka gaareen lugtii hore ayaa u suurtagelisay inay ugu dambayn ku soo baxaan wareega xiga iyaga oo 5-3 guusha guud ku helay.
Ciyaartii ka dhacday garoonka Signal Iduna Park, weeraryahanka Dortmund Serhou Guirassy ayaa noqday geesiga kooxda, isagoo saddexleey dhaliyay. Wuxuu goolka furitaanka ku dhaliyay rigooro Panenka ah daqiiqaddii 11aad, wuxuuna ku daray madax kale qeybtii labaad, halka goolkiisii saddexaad uu ka faa’iideystay qalad uu sameeyay daafaca Barcelona ee Ronald Araújo daqiiqaddii 76aad.
Barcelona ayaa hal gool iska soo celisay kadib markii daafaca Dortmund ee Ramy Bensebaini uu si lama filaan ah iskaga dhaliyay gool daqiiqaddii 54aad, taas oo soo afjartay rajadii Dortmund.
Inkasta oo Dortmund ay si adag u dagaalantay oo ay fursado badan abuurtay, haddana natiijadii weynayd ee lugta hore ayey Barcelona uga faa’iideysatay.
Tani waxay Barcelona u tahay markii ugu horreysay ee ay gaarayaan semi-finalka Champions League tan iyo sanadkii 2019, markaas oo ay Liverpool ka reebtay. Waxay hadda sugayaan inay la kulmaan mid ka mid ah labada koox ee Inter Milan ama Bayern Munich.
Ciyaartani waxay muujisay dadaalka labada koox, balse Barcelona ayaa ku guuleysatay in ay dadaalkii hore ee lugta hore u beddesho guul taariikhi ah.
