Kabtanka Manchester United, Bruno Fernandes, ayaa muujiyay niyad-jab xooggan kaddib guuldarradii 4-1 ee kooxdiisa kala kulantay Newcastle United, kulan ka dhacay garoonka St. James’ Park, April 13, 2025.
Isagoo la hadlayay warbaahinta ciyaarta kadib, Fernandes wuxuu yiri:
“Waxaan iska siinnay goolal qaar, qeybtii hore waan fiicnayn waxaana helnay fursado waaweyn. Laakiin qeybtii labaad uma awoodin inaan u ciyaarno sidii aan rabnay sababtoo ah kama aanan bixin karin khadkooda xirashada adag. Si fiican uma aanan sameynin dhaqdhaqaaq, goolasha badankoodna waa khaladaad naga yimid.”
Bruno Fernandes wuxuu intaas ku daray isagoo ka hadlaya dhaleeceynta kooxda:
“Way sahlan tahay in la is dhaleeceeyo sababtoo ah kooxdan weligeed ma aysan arkin waqti adag sidan oo kale ah. Taageerayaasheennu way nala joogeen xilli ciyaareedkan oo dhan marka ay xumaayeen wax walba, maanta dhamaadkii ciyaarta way na garab taagnaayeen si ay noo dhiirrigeliyaan. Waa waqtigii aan wax u celin lahayn.”
Fernandes wuxuu sidoo kale carabka ku adkeeyay muhiimadda kulanka xiga ee ay la ciyaarayaan Lyon lugta labaad ee wareegga siddeed dhammaadka Europa League, isagoo sheegay in kooxda laga rabo inay diiradda saarto oo ay keento natiijo wanaagsan si ay u saxdo khaladaadkii hore.
