Kooxda Manchester United ayaa go’aansatay inay sii waddo wadahadallada ay kula jirto kabtankeeda Bruno Fernandes si loo cusboonaysiiyo qandaraaskiisa, inkastoo xiddigan uu iska diiday dalabkii labaad ee loo soo bandhigay, sida ay ku warrantay shabakadda TEAMtalk.
Fernandes ayaa doonaya heshiis cusub oo soconaya ilaa bisha Juun 2030, balse maamulka United ayaa ka cago-jiidaya inay aqbalaan codsigiisa sababo la xiriira da’diisa iyo hoos-u-dhaca ku yimid qaab-ciyaareedkiisa xilli-ciyaareedkan. Arrintan ayaa imaanaysa xilli uu xilli-ciyaareedkii hore soo bandhigay wacdaro cajiib ah, isagoo caawiyay 21 gool 35 kulan oo horyaalka Premier League ah, isla markaana ku guuleystay abaalmarinta Xiddiga Sanadka ee PFA.
Mas’uuliyiinta United ayaa weli aaminsan inay ku qancin karaan laacibkan reer Portugal inuu qalinka ku duugo heshiis cusub, iyadoo ilo-wareedyo ku dhow ciyaaryahanka ay xaqiijiyeen in ugu dambeyn heshiis la gaari doono.
Kooxda ayaa haysata dookh ay qandaraaskiisa haatan ku kordhin karto ilaa xagaaga 2028, taas oo siinaysa waqti dheeraad ah oo ay ku wada xaajoodaan, gaar ahaan maadaama uu Fernandes rabo inuu sii joogo, imaatinka tababare Mauricio Pochettino-na uu dib u soo celin karo xamaasaddiisa.
Haddii wadahadalladu burburaan, horyaalka Sucuudiga ayaa u muuqda halka ugu dhow ee uu aadi karo, iyadoo kooxda Al Hilal ay diyaar u tahay inay saddex laab ka dhigto mushaharkiisa, isla markaana ay Manchester United miiska u saarto 100 milyan oo gini.
