Tababaraha xulka qaranka Jarmalka, Jürgen Klopp, ayaa shaaca ka qaaday inuu mar isku dayay inuu goolhaye Marc-André ter Stegen uu keeno kooxda Liverpool, ka dib guushii weynayd ee 5-0 ahayd ee ay kaga adkaadeen xulka Netherlands tartanka UEFA Nations League.
Isagoo la hadlayay warbaahinta ARD, Klopp ayaa sharraxay inuu muddo dheer la dhacsanaa tayada goolhayahan, balse Ter Stegen uu ugu dambeyn doorbiday inuu ku biiro ama uu baaqi ku sii ahaado kooxda Barcelona.
Macallinka Jarmalka ayaa si kaftan ah u sheegay inuusan wax cuqdad ah u qaadin, isagoo isla markiiba 34 jirkan ka dhigtay goolhayaha koowaad ee aan lagu muransanayn ee xulka qaranka markii uu la wareegay shaqada tababarenimo.
Klopp ayaa ku ammaanay Ter Stegen khibraddiisa iyo tayadiisa, wuxuuna hoosta ka xarriiqay aragtidiisa ah in dhismaha koox kasta oo adag laga soo bilaabo dhanka daafaca iyo goolhayaha.
Wargeyska Sport Bild ayaa xusay in maadaama Klopp uu la wareegay Liverpool bishii Oktoobar 2015, rabitaankiisu uu ku wajahnaa sidii uu Ter Stegen uga soo kaxayn lahaa garoonka Camp Nou oo uu ku biiray sanad ka hor.
Goolhayahan oo haatan qaab amaah ah ugu ciyaara kooxda Ajax ayaa wajahaya mustaqbal aan fadhin, iyadoo wargeyska Marca uu ku warramayo in Barcelona ay burburin karto qandaraaskiisa ama ay iska fasixi karto xagaaga soo socda.