Xiddiga Khadka dhexe ee kooxda Liverpool, Alexis Mac Allister, ayaa farriin u diray taageerayaasha Reds taas oo ku saabsan wararka la isla dhexmarayo suuqa ee sheegaya inuu mustaqbalka dhow ka tagi karo garoonka Anfield, xilli lala xiriirinayo Real Madrid.
Liverpool ayaa xiddigan heerka caalami ee reer Argentina kula soo wareegtay qiimo ku dhow 35 milyan oo gini xagaagii 2023-kii iyagoo ka soo qaatay Brighton. Ka dib markii uu saxiixay qandaraas shan sano ah, Mac Allister wuxuu kooxda ka caawiyay inay ku guuleysato horyaalka Premier League xilli-ciyaareedkiisii labaad ee uu ka hoos ciyaaro Arne Slot.
Inkastoo isaga iyo dhowr ciyaaryahan oo kale si weyn loo dhaliilay xilli-ciyaareedkii hore ka dib markii uu hoos u dhac ku yimid qaab-ciyaareedkooda, haddana xiddiga reer Argentina ayaa dib ugu soo laabtay heerkiisii ugu fiicnaa xilli-ciyaareedkan isagoo ka hoos ciyaaraya tababare Andoni Iraola.
Mac Allister oo dhaliyay goolkii furitaanka guushii 3-1 ahayd ee ay Liverpool Axaddii ka gaartay Crystal Palace, ayaa u sheegay wargeyska AS: “Waan jeclahay dhalinta goolasha iyo inaan ku jiro xerada ganaaxa, nasiib wanaagna shaqaalaha tababarka ee Andoni Iraola way fahamsan yihiin taas. Waxay rabaan inaan weeraro boosaskaas, aad ayaana ugu faraxsanahay goolka iyo saddexda dhibcood.”
Xiddigan oo horraantii xilli-ciyaareedkan muujiyay sida uu uga xumaaday in Liverpool ay diiday inay qandaraas cusub u soo bandhigto xagaagii, ayaa mar wax laga weydiiyay mustaqbalkiisa farriin u diray taageerayaasha: “Weli waqti ayaa haray. Taageerayaashu uma baahna inay walwalaan. Waxay ku xirnaan doontaa sida aan u ciyaaro sanadahan. Waxaan bixin doonaa 100%, waxaana rajeynayaa in maamulka sare ay maskaxdooda beddeli doonaan.”
Isagoo dib u milicsanaya waqtigiisii Liverpool ayuu hadalkiisa ku soo xiray: “Sanado aad u wanaagsan ayaan ku qaatay Liverpool. Waxaan xusuustaa sanadkii aan ku guuleysannay Premier League iyo sanadkii ugu horreeyay ee aan la shaqeeyay Jürgen Klopp. Guud ahaan, marka laga reebo sanadkii hore, waxay ahaayeen sanado aad u fiican.”
