Tababaraha xulka qaranka Faransiiska, Zinedine Zidane, ayaa u magacaabay weeraryahanka kooxda Paris Saint-Germain ee Désiré Doué, ciyaaryahanka soo xusuusiya naftiisa waqtigii uu ciyaari jiray.
Zidane oo Jimcihii shir jaraa’id qabtay ka dib markii uu ku dhawaaqay liiska xulkiisa ee kulamada Nations League ee dhammaadka bishan, ayaa ku tilmaamay da’yarkan mid si fiican wax u dhageysta, isagoo intaas ku daray inuu aad uga helo dabeecaddiisa.
Tababaraha ayaa yiri: “Marka laga hadlayo Désiré, waa ciyaaryahan leh xirfad cajiib ah, isla markaana si fiican wax u dhageysta. Waxa aan ka helo ayaa ah inuu aad ugu oomman yahay inuu horumar sameeyo oo uu koobab ku guuleysto.”
Zidane oo hadalkiisa sii wata ayaa raaciyay: “Aad ayaan uga helaa qaab-ciyaareedkiisa garoonka dhexdiisa iyo dabeecaddiisa. Haddii aan runta sheego, waxaan isaga ka dhex arkaa naftaydii waagii hore, sababtoo ah aniguba waxaan u hamuun qabay inaan horumaro, waxaana dhageysan jiray ciyaartoyda iga waaweyn iyo dadkii igu xeernaa.”
