Liverpool ayaa fursad weyn u heshay saxiixa Xiddiga khadka dhexe ee reer Senegal, Lamine Camara, kaasoo u ciyaara AS Monaco, kaddib markii Chelsea ay go’aansatay inay diiradda saarto ciyaaryahan kale suuqa kala iibsiga Janaayo.
Chelsea ayaa ku dhawaatay inay Camara la saxiixato maalintii ugu dambeysay ee suuqa xagaaga, balse heshiiska ayaa burburay inkastoo dhammaan dhinacyadu ay isku afgarteen.
Sida ay sheegtay TEAMtalk, Liverpool ayaa si dhow ula socota xaaladda ciyaaryahanka 22-jirka ah, waxayna xiriir la sameysay wakiilladiisa, sida uu qoray wargeyska The Sun.
Wariye Ben Jacobs ayaa sheegay in AS Monaco ay ku dooneyso Camara lacag ku dhow 60 milyan oo ginni. Qandaraaska ciyaaryahanka ee kooxda Faransiiska ayaa dhacaya xagaaga 2029.
Dhanka kale, wariye Pete O’Rourke oo la hadlay Football Insider ayaa sheegay in Chelsea ay ka wareegtay xiisihii Camara, isla markaana ay Alex Scott oo u ciyaara Bournemouth ka dhigatay bartilmaameedkeeda koowaad ee suuqa Janaayo.
TEAMtalk ayaa intaas ku dartay in Chelsea ay diyaar u tahay inay in ka badan 100 milyan oo ginni ku bixiso saxiixa Scott.
Go’aanka Chelsea ayaa Liverpool siinaysa fursad dheeraad ah oo ay ku sii waddo dadaalkeeda ku aaddan saxiixa Lamine Camara.
