Tababaraha Real Madrid, José Mourinho, ayaa Kylian Mbappé ku tilmaamay ciyaaryahan aan la mid ahayn ciyaartoyda kale kaddib markii kabtanka xulka Faransiiska uu ku guuldarreystay inuu hanto abaalmarinta Ballon d’Or 2026.
Mbappé ayaa kaalinta labaad ka galay codbixintii abaalmarinta, iyadoo Harry Kane oo u ciyaara Bayern Munich uu ku guuleystay xafladdii Isniintii hore ka dhacday London.
Mourinho oo ka hor hadlay kulanka Real Madrid ay maanta la ciyaareyso Racing Santander ee LaLiga, ayaa sheegay in Mbappé uu yahay ciyaaryahanka ugu fiican taariikhda Koobka Adduunka.
“Kylian waa ciyaaryahan gaar ah. Xiddigo ay ka mid yihiin Messi, Cristiano Ronaldo iyo Platini ayaa dhowr jeer ku guuleystay Ballon d’Or,” ayuu yiri Mourinho.
“Ballon d’Or sannad kasta ayaa la bixiyaa, balse ciyaaryahanka ugu fiican taariikhda Koobka Adduunka waa hal qof oo keliya.”
Mbappé ayaa haatan ah gooldhaliyaha ugu sarreeya taariikhda Koobka Adduunka, isagoo dhaliyay 22 gool.
Xiddigii hore ee Paris Saint-Germain ayaa sidoo kale ku guuleystay kabta dahabka ah ee Koobka Adduunka, kaddib markii uu noqday gooldhaliyaha ugu sarreeya tartanka, isagoo ka hor maray Lionel Messi oo Argentina ah.
