Gary Neville ayaa daboolka ka rogay inuu doonayo in Michael Carrick laga cayriyo Manchester United, isagoo ku dooday in tababaraha mararka qaar shaqada looga ceyriyo si loo ilaaliyo sharaftiisa.
“Waxaan u maleynayaa in 24-kii saac ee ka dambeeyay kulankii Bournemouth ay arrintan si weyn uga doodeen hoggaanka kooxda, iyagoo marba dhinac u janjeeray,” ayuu Neville ka yiri barnaamijka Stick to Football.
Wuxuu sheegay inuusan si dhab ah u ogeyn waxa dhacay, balse uu aaminsan yahay in dooddaasi ay maamulka ku keentay jahawareer, ugu dambayn na ay go’aansadeen inay Carrick sii haystaan.
Neville wuxuu intaas ku daray in go’aankaas uu muujinayo qorshe la’aan, tababarayaal kale oo la heli karo oo kooban iyo go’aan-qaadasho liidata.
“Mararka qaar tababaraha waa in shaqada laga ceyriyaa, iyadoo la tixgelinayo sharaftiisa. Aniga waxaa la iga cayriyay Valencia, waana ku farxay inay iga dulqaadeen dhibaatadii aan ku jiray,” ayuu yiri.
Neville ayaa sidoo kale ka hadlay jawiga qolka labiska, isagoo sheegay in ciyaartoydu gudaha si ka adag uga hadli karaan tababaraha.
Wuxuu tusaale u soo qaatay Bruno Fernandes, kabtanka United, oo dhaleeceeyay xeeladaha Carrick kaddib guuldarradii 4-1 ee Como, isagoo sheegay in hadalka bannaanka loo soo bandhigay uu noqon karo qayb yar oo keliya oo ka mid ah waxa ciyaartoydu gudaha ku sheegaan.
