Xiddig ka tirsan kooxda kubadda cagta Arsenal ayaa la garan waayey muuqaalkiisa inkasta oo maalmo kooban uu ku jiro fasax oo uu ku jiray liiska ciyaartoyda kooxdiisa ee maalintii ugu dambaysay ee horyaalka lasoo gabogabaynayey.
Arsenal oo kaalinta labaad ee Premier League ku dhamaysatay xilli-ciyaareedkii labaad oo xidhiidh ah isla markaana laba dhibcood ka dambaysay Man City oo afar sannadood oo isku xigta ku guuleysatay horyaalka, ayaa waxa ciyaartoydeedu ay galeen fasax ay muddo bil iyo dheeraad ah ku maqnaan doonaan, marka laga reebo xiddigaha looga yeedhay xulalka dalalkooda ee ka qayb-gelaya tartamada Euro 2024 iyo Copa America.
Goolhayaha Arsenal ee Aaron Ramsdale oo laga reebay liiska xulka qaranka England ee ka qayb-gelaya tartanka Euro 2024, ayaa waxa sawirro laga qaaday isaga oo fasax ku jira waxa garan waayey taageereyaasha kubadda cagta.
Ramsdale oo ka qayb-galay ciyaartii ay Southampton maanta ugu soo dallacday horyaalka Premier League, ayaa sawirka laga qaaday uu xidhan yahay shaarubbo iyo gadh macmal ah, sidoo kalena madaxa ayaa waxa uu gashaday maro u ekaysiisay inuu leeyahay timo dhaadheer.
Sawirkan oo baraha bulshada la wareejinayey maanta ayaa sidoo kale waxa soo qaatay warbaahinta waaweyn ee Ingiriiska oo taageereyaasha su’aalayey qofka uu yahay.
