Xiddiga Barcelona ka tirsan oo diiday Man Utd inkastoo kooxda Ingiriiska ay u bandhigtay inay laba jibbaarto mushaarkiisa.
Xiddiga Barcelona, Fermin Lopez, ayaa la soo warinayaa inuu diiday dalab uga yimid Manchester United bishii Janaayo, inkastoo kooxda Premier League ay diyaar u ahayd inay laba jibbaarto mushaarkiisa haatan.
Sida laga soo xigtay wargeyska Isbaanishka ee Sport, United iyo kooxda kale ee Premier League-ka ee Aston Villa waxay diyaar u ahaayeen inay Barcelona siiyaan €70m (£58.3m) si ay u helaan 21-jirkan.
Si kastaba ha ahaatee, Lopez ayaa si cad u sheegay inuusan wax rabitaan ah u qabin ka tagista Barcelona, isagoo weli si buuxda ugu heellan kooxda Catalan-ka ah.
Xiddiga khadka dhexe ayaan xitaa tixgelin dalabyadii uga yimid United iyo Villa, inkastoo ay diyaar u ahaayeen inay laba jibbaaraan mushaarkiisa oo lagu qiyaasay €76,923 usbuucii (£64,000 usbuucii).
Lopez, oo laba jeer u saftay xulka Spain, waxa uu kasoo baxay akadeemiyada Barcelona, ilaa hadda wuxuu u saftay 66 kulan, isagoo dhaliyay 15 gool halka uu sameeyay 6 caawin.
Bishii hore ayuu Barcelona ka caawiyay hanashada Supercopa de España, waxaana marar badan ammaanay tababare Hansi Flick.
Lopez ayaa rajeynaya inuu Barcelona kula guuleysto horyaalka La Liga xilli ciyaareedkan, iyadoo kooxda Flick ay shan dhibcood ka dambeyso Real Madrid, balse ay haystaan kulan baaqi ah si ay u soo yareeyaan farqiga dhibcaha ee u dhaxeeya ayaga iyo Real Madrid.
