Tababaraha Liverpool, Arne Slot, ayaa bixiyay warbixin cusub oo ku saabsan dacwadda uu kala kulmay FA kaddib casaankii uu qaatay kulankii Everton, iyadoo kooxda haatan la socota sababaha uu garsoore Michael Oliver ugu taagay tababare Slot casaanka.
Slot iyo caawiyihiisa Sipke Hulshoff ayaa lagu eedeeyay aflagaaddo kaddib markii labadooda la siiyay casaan kaddib ciyaartii barbaraha 2-2 ku dhamaatay Arbacadii.
Curtis Jones ayaa seegay guushii 2-1 ee Wolves kaddib laba jaale oo uu ku qaatay Goodison Park, ma jiro ganaax toos ah oo macallimiinta lagu soo rogay.
Liverpool ayaa haatan wadaxaajood la leh FA si dhammaan dhinacyadu u soo bandhigaan caddeymohooda kahor inta aan go’aan laga gaarin ciqaabta macquulka ah.
Markii uu Sky Sports la hadlay kaddib guushii Wolves, Slot ayaa shaaca ka qaaday in kooxda haatan maqashay sababaha uu Oliver ugu arkay sax casaanka la siiyay isaga iyo Hulshoff.
“Kahor ciyaarta ayaan sheegay in ay weli socoto dacwadda,” ayuu Slot yiri.
“Waxaan maqalnay faallooyinka garsooraha, haddana annaga ayaa jawaabteena ku dari doonna.”
“Kadib, guddi ayaa go’aan ka gaari doona – haddii aan ganaax mudanahay, iyo haddii aan mudneyn, iyo inta kulan ee uu noqonayo ganaaxaas.”
Waxaa muuqata in Slot uu ka qoomamaynayo dhacdadii Goodison Park, balse waxaa suuragal ah in Liverpool ay racfaan ka qaadato go’aanka Oliver, maadaama ay jiraan cabashooyin ku saabsan qaabkii uu garsooruhu ciyaarta u maamulay.
