Tababare Zinedine Zidane ayaa waayey shaqo uu sugayay muddo laba sannadood ah, taas oo ka joojisay inuu qabto shaqooyin kale oo heer kooxeed ah oo lacago bdan usoo bandhigay.
Zidane ayaa la ogaaday in aanu shaqadan qabanayn waxyar ka hor finalkii Koobka Adduunka ee bishii December ay Argentina rikoodheyaasha ku garaacday Faransiiska, markaas oo uu iska diiday inuu ka qayb-galo ciyaartii finalka oo uu ku casuumay Madaxweynaha dalkiisa France Emmanuel Macron iyo sidoo kale xidhiidhka kubadda cagta FFF.
Zinedine Zidane oo aan wax shaqo ah qabanin tan iyo markii uu iska casilay Real Madrid xagaagii 2021, ayaa waxa si weyn la iskula dhax marayay inuu beddelayo Didier Deschamps oo la sheegayay inuu ka tegayo xulka France bishii December, laakiin xidhiidhka kubadda cagta Faransiiska ayaa maanta shaaciyey in Didier Deschamps uu saxeexay heshiis cusub oo uu kusii ahaan doono tababaraha xulkaas illaa sannadka 2026.
Madaxweynaha xidhiidhka kubadda cagta Faransiiska ee Le Graët ayaa ku dhawaaqay in Deschamps uu heshiis cusub saxeexay, waxaanay taasi meesha ka saaraysaa Zinedine Zidane oo uu ka xidhmay albaabkaasi, waxaana uu hadda u jeedsan doonaa dhinaca naadiyada oo uu kusoo noqon doono, inkasta oo ay jiraan warar ku xidhiidhinaya xulka qaranka Brazil.
Si kastaba ha ahaatee, Zinedine Zidane ayay si weyn indhaha ugu hayaan PSG oo la rumaysan yahay in ciyaartoydeeda qaarkood sida Kylian Mbappe ay doonayaan in lagu beddelo Christophe Galtier.
