Zinedine Zidane ayaa go’aan lama filaan ah ka gaadhay ka qayb-galka ciyaarta finalka Koobka Adduunka ee xulkiisa Faransiiska ay Axadda berri iskaga hor iman doonaan Argentina. Halyeygan ayaa la sheegay inuu martiqaad ka helay xidhiidhka kubadda cagta Faransiiska oo hore loo sheegay inay doonayaan inuu noqdo tababaraha beddelaya Didier Deschamps.
Zidane oo xidhiidh fiican oo saaxiibtinimo ka dhexeeyo Karim Benzema oo xogo soo baxaya ay sheegayaan in Deschamps uu ka caydhiyey xulka qaranka Faransiiska markii uu soo gaadhay dhaawac fudud oo kaliya saddex maalmood uu ku maqnaan lahaa, isla markaana taam u noqon lahaa kulankii labaad ee wareeggii group-yada, ayaa waxa uu qaatay go’aan uu kula safanayo Benzema oo ay kasoo wada jeedaan Algeria.
Warbaahinta MD ee Faransiiska ayaa sheegtay, in martiqaad khaas ah oo xidhiidhka kubadda cagta Faransiisku uu u diray uu Zidane iska diiday, isla markaana aanu ka qayb-geli doonin finalka Koobka Adduunka, inkasta oo illaa hadda aanu Zidane ka hadal arrintan.
MD waxay sheegtay in Zidane uu gurigiisa ka daawan doono ciyaarta oo aanu tegi doonin magalada Doha ee waddanka Qatar ee uu ka dhacayo finalka Koobka Adduunku, waana go’aan la mid ah kii uu Karim Benzema xalay shaaciyey ee ahaa in aanu wax xiiso ah u haynin inuu tago finalka Koobka Adduunka.
Zidane iyo Benzema oo hore u sheegay in ay iskugu yeedhaan walaalka weyn iyo walaalka yar ayaa waqti fiican kusoo wada qaatay Real Madrid intii u dahxaysay 2016 illaa 2018 oo ay saddex Champions League iyo horyaalka LaLiga ku wada guuleysteen. Sidoo kale laba xilli ciyaareed oo xigay oo uu Zidane kusoo laabtay Madrid ayay horyaalka LaLiga wada qaadeen.
