Wargeyska L’Equipe ayaa maanta boggiisa hore ku daabacay sawir weyn oo Lionel Messi ah oo uu raaciyey xogo layaab leh oo uu ku sheegayo, in xiddiga reer Argentina uu yahay muwaadin u dhashay waddanaka Faransiiska, xilli laba maalmood kaddib kaddib la ciyaari doono finalka Koobka Adduunka oo ay foodda isku darayaan Faransiiska iyo Argentina.
L’Equipe oo ka mid ah wargeysyada ugu waaweyn waddanka Faransiiska, ayaa waxa uu cinwaan far waaweyn ah ku qoray: “Messi Le Francais’ oo macnaheedu yahay ‘Messi waa nin Faransiis ah’, waxaana uu ku ladhay xogo uu kusii xoojinayo dooddan oo laga yaabo in ay dad badan layaab ku noqon doono.
Lionel Messi oo u ciyaara Paris Saint-Germain oo heshiiskiisii labada sannadood ahaa uu ku egyahay dhamaadka xilli ciyaareedkan, isla markaana aan la ogeyn waxa uu yeeli doono, ayaa waxay iska hor imanayaan xiddiga ay isku kooxda yihiin ee Kylian Mbappe.
Wargeyska L’Equipe waxa uu xusay in madaxweynaha PSG ee Nasser Al-Khelaifi uu maar horeba wada-hadallo heshiis kordhin ah la yeeshay Lionel Messi, laakiin uu 35 jirkani ku adkaystay in waqtigan uu kaliya ay diiraddiisu saaran tahay finalka Koobka Adduunka ee Axadda oo aanu gelayn wada-hadal ku saabsan mustaqbalkiisa.
Messi oo hore u qirayy in finalka Koobka Adduunka ee Axadda ay tahay ciyaartiisii ugu dambaysay ee Koobka Adduunka, ayaa waxa uu L’Equipe xusay, in uu jecel yahay in uu ku noolaado caasimadda Faransiiska, isla markaana ay saamayn iyo xusuuso qaali ah ku leedahay noloshiisa oo uu toddoba jeer ku qaaday abaal-marinta Ballon d’Or.
14kii bilood ee uu Messi joogay PSG, waxa uu bilowgii hore deggenaa hotelka qaaliga ah ee Royal Monceau ee ku yaalla Paris, balse waxay markii dambe isaga iyo qoyskiisuba u guureen guri qasri ah oo ku yaalla xaafadda Neuilly-sur-Seine.
Carruurtiisa ayaa waxay sidoo kale bilaabeen barashada luuqadda Faransiiska oo la sheegay inay durba ugu hadalyaan sidii ay tahay luuqaddii aya u dhasheen. Sidoo kale xaaskiisa Antonella ayaa shaqooyin xayaysiisyo ah ka samaysa Faransiiska.