Weeraryahanka kooxda Burnley balse qaabka amaahda ah kula jooga kooxda Turkish-ka ah ee Besiktas ee Wout Weghorst ayaa u muuqda mid waxkasta u samaynaya si uu Man United ugu biiro.
Weghorst ayaa doonaya inuu Old Trafford kula midoobo tababaraha ay isku dhalashada yihiin ee Erik Ten Hag kaas oo ka dhigtay saxeexa uu weerarkiisa ku xoojinayo xagaagan.
Ten Hag ayaa lahaa bartilmaameedyo kale oo ka horreeyay Weghorst balse Manchester ayaa caddaysay inaysan doonayn inay wax lacag ah bixiso suuqan January gaar ahaan in mulkiilayaasha kooxdaasi doonayaan inay iibiyaan kooxda.
Wout ayaa xilli ciyaareedkan amaah ku jooga Besiktas kaddib markii uu iskaga tagay Burnley oo heerka labaad ee England u dhaadhacday.
Si kastaba, haatan saxafiga Turkish-ka ah ee Gokhan Dinc ayaa sheegaya in Weghorst uu samayn doono talaabo cajiib ah oo ah inuu diyaar u yahay inuu isagu jeebkiisa ka bixiyo lacagta ay Besiktas dalbanayso haddii ay saxeexiisa ku adkayso Man United.
30 sano jirkaas ayaa hore uga soo ciyaaray horyaalka Bundesliga gaar ahaan kooxda Wolfsburg oo uu 77 gool ugu soo dhaliyay 144 kulan.
Wout ayaa ah nooc weeraryahan oo ka duwan dhaliyayaasha haatan Old Trafford jooga isagoo ah weeraryahanada baaqiga ku dhex ah xerada ganaaxa (Target Man).
