Barcelona ayaa laba dhibcood lumisay kulankeedii ugu dambeeyey sannadkii hore ee 2022, waxaanay barbarro 1-1 ah la galeen Espanyol ciyaar xamaasaddeedu sarraysay oo uu dabka kusii shiday Robert Lewandowski oo loo ogolaaday inuu dheelo isaga oo ganaax saddex ciyaarood ah lagu diray.
Garsoore Mateu Lahoz ayaa wacdaro ka dhigay ciyaartan, waxaana uu jabiyey rikoodhkii kaadhadhka ee horyaalka Spain ee LaLiga oo ahaa mid isagu uu hore u dhigay.
Waxa uu bixiyey 15 kaadh oo digniin ah iyo laba casaan ah, waxaana shaqsiyaadka la siiyey ku jira Xavi Hernandez oo ka cadhooday go’aamada garsooraha laakiin uu Lahoz ugu tegay laynka oo uu kusoo siiyey kaadh digniin ah.
Espanyol ayay u ahayd markii ugu horreysay ee ay dhibic kasoo hesho Barcelona oo garoonkeeda Camp Nou ku ciyaaraysa tan iyo sannadkii 2009, balse bandhiggooda waxa qariyey garsoore Lahoz oo ay dunidu hadal hayso.
Saddex daqiiqadood gudahood ayuu Lahoz kaadhadh casaan ah ku siiyey Jordi Alba iyo Vinicus Souza, laakiin waxa layaab lahayd in difaaca Barcelona ee Jordi Alba uu u badheedhay kaadhka oo uu illoobay inuu hore u qaatay kaadh digniin ah.
Sergio Roberto oo la hadlayay Diario AS ayaa waxa uu sheegay in Jordi Alba uu illoobay in uu kaadh hore oo digniin ah qaatay, waxaanu yidhi: “Alba waxa uu illoobay kaadhkiisii hore. Anigu ma garanayo wixii uu ku yidhi ee garsooraha ka cadhaysiiyey.
“Laakiin dhamaantayo waanu la yaabnay. Qaybtii labaad waxa aanu doonaynay in aanu weerar galno oo aanu gool labaad la nimaadno, ciyaartana annaga ayaa maamulaynay.”
