Halyeeyga xulka France ee David Trezeguet ayaa caddaystay inuu Koobka aduunka maanta dalkiisa iyo Argentina dhex maraya la doonayo xulka South American-ka ah.
Trezeguet ayaa kamid ahaa xiddigihii kasoo caawiyay France Koob aduunkoodii ugu horreeyay 1998, markale ayay maanta midkoodii saddexaad u ordayaan.
Marka laga yimaado inuu French yahay, sidoo kale Trezeguet ayaa haysta sabab weyn oo uu Argentina ku taageero maadaama hooyadii dalkaas kasoo jeedo isla markaana uu isagu kusoo koray caasimada Buenos Aires oo uu xataa waayihiisa ciyaareed ka bilawday.
Trezeguet oo TyC Sports la hadlay kahor Finalka maanta ayaa sheegay inuusan shaqsiyan doonayn Final u dhaxeeya labada dal ee uu ku ab-tirsado balse uu la jecel yahay Koobka Lionel Messi.
“Kulankani waa wax aanan anigu doonayn, balse waa Finale weyn. Waa midkii aynu dhammaanteen rajaynaynay, iyagu waa labada xul ee ugu wanaagsanaa Koobka adduunka” ayuu yidhi David.
“Markasta waan kusoo celceliyaa, dareen ahaan, markaad ogtahay inuu yahay koob aduunkiisii ugu dambeeyay, Leo wuu u qalmaa inuu ku guuleysto. Dadka ayuu riyo galiyaa”.
Si lamid ah Trezeguet, sidoo kale Andre-Pierre Gignac oo isaguna 36 kulan soo metelay France ayaa qaba isla aragtida ah inuu Lionel Messi koobkan mudan yahay isagana taageerayo.
