Garabka weerar ee kooxda Real Madrid ee Eden Hazard ayaa halkiisa kasii wata xog aan u fiicnayn oo uu ka haysto kulanka El-Clasico ee kooxdiisa iyo Barcelona dhex mara.
Labada kooxood ayaa markale kulmay gudaha toddobaadkan iyagoo isku arkay magaalada Riyadh Finalka Spanish Supercup oo ay Barca 3-1 ku qaaday.
Maaha wax layaab leh in Hazard uusan waxba ku qabsan Real Madrid mudada afarta sano ku dhaw ee uu joogo balse hoos u dhaciisa sii socda ayaa ah mid argagax leh.
Hazard ayaa heshiis 115 Milyan oo euro ah ugu wareegay Real Madrid xagaagii 2019, waxa loo arkayay mid wakhtigii ugu fiicnaa waayihiisa ciyaareed ku jira oo buuxin doona booskii uu Cristiano Ronaldo ku baneeyay kooxdaas.
Arrinta caddaynta buuxda u ah fashilkiisa Madrid ayaa ah inuusan afar sano ku dhawaad uu kooxdaas joogo wal hal daqiiqo ka ciyaarin Kulan El-Clasico ah xilli ay sagaal kulan Clasico dhaceen mudadaas.
Kahor xilli ciyaareedka ayuu tababare Carlo Ancelotti sheegay inuu Hazard No.9 ka ciyaari doono xilli ciyaareedkan kulamada Karim Benzema maqan yahay, iyadoo Benzema qaybtii hore ee xilli ciyaareedka in badan seegay ayuu Hazard ku qancin waayay tababaraha Talyaaniga ah inuu fursad ka helo.
