Tartanka loogu jiro abaal-marinta kabta dahabka ah ee Koobka Adduunka ayaa woxoogaa uu hoos u dhac ku yimid, waxaana ka hadhay ciyaartooyo badan oo uu hunguri ka hayay in ay ku guuleysan karaan balse dalalkoodu ay hadheen iyaga oo haysta fursad haddii ay kusii jiri lahaayeen Koobka Adduunka ay ugu sii tartami lahaayeen kabta dahabka ah.
Guushii xulka qaranka Morocco ay ka gaadhay Portugal ee ay kaga reebtay Koobka Adduunka ayaa waxay liiska tartameyaasha kabta dahabka ah ka Congalo Ramos oo afka hore uga ciyaara Portugal oo isaga oo saddex gool haysta hadhay. Sidoo kale, wareeggii 16ka ayay Morocco kusoo reebtay Spain oo uu ku jiray Alvaro Morata oo saddex gool ka dhaliyey tartanka, isla markaana ku riyoonayay inuu ku guuleysan karo kabta dahabka ah.
Faransiiska ayaa isaguna is-raaciyey xulka qaranka England oo xalay ay tartanka ka saareen iyo laba ciyaartoy oo uu hunguri kaga jiray kabta dahabka ah oo min saddex gool haystay, waana Bukayo Saka iyo Marcus Rashford.
Kylian Mbappe ayaa illaa hadda hoggaaminaya tartanka gool-dhalinta, waxaana uu haystaa shan gool. 23 jirkan ayaa Arbacada ka hor tegi doona Morocco waxaana haddii uu goolal dhaliyo uu awoodi doonaa in uu sii dheeraysto tartanka.
Waxa kale oo afar gool haysta Lionel Messi oo Jimcihii dhaliyey goolkiisa afraad, kaas oo ahaa goolkii 10aad ee uu laacibkani ka dhaliyo shan Koob Adduun oo uu ciyaaray.
Ciyaartoyga saddexaad ee ku tartamaya abaal-marinta kabta dahabka ah ee Koobka Adduunka waa weeraryahanka xulka Faransiiska ee Olivier Giroud oo saddex gool dhaliyey, waxaana ugu dambaysay inuu shabaqa soo taabto ciyartii England ee xalay oo uu madax awood badan guusha ugu go’aamiyey Faransiiska.
