Xulka qaranka Wales ayaa iska bedelaya magaca ka dib Koobka Adduunka. Xiriirka kubada cagta Wales ayaa doonaya in xulkooda loogu yeero “Cymru” oo ah magaca luqada Welsh ee Wales, iyagoo doonaya in dunida ay ugu yeerto magaca ay iyagu isagu yeeraan luqadooda gaarka ah.
Wales oo haatan ka qeyb galeysa Koobkeedii Adduun ee ugu horeysay tan iyo 1958kii ayaa qarka u saaran inay harto ka dib guuldaradii ka soo gaartay Iran iyagoo sidoo kale barbaro la soo galay Mareykanka waxaana u harsan England.
“Xulka waa in mar walba loogu yeero Cymru – waa magaca aan anagu isku naqaano.” ayuu yiri madaxa guud ee xiriirka kubada cagta Wales Noel Mooney.
“Marka aan joogno dalkeena waxaan isku naqaanaa Cymru. Xulkeena qaranka sidaas ayaan ugu yeernaa. Haddii aad aragto website-keena, waxaan isagu yeernaa Cymru.
“Dunida inteeda kale ayaa inoo taqaana Wales balse waa inaan shaqo ka qabano. Koobkaan Adduun waxaan uga qeyb galeynaa magaca Wales laakiin 2023ka waxaan u bedeleynaa magaca luqadeena aan isagu yeerno.”
Arintaan ayaa timid markii Wales ay isku soo aadeen wareega group-yada isreebreebka Euro 2024 xulka Turkiga.
Turkiga ayaa iska bedelay magagacooda oo luqada Ingariiska u dhignaa, waxayna la baxeen magacooda luqada Turkiga ku dhigan ee Turkiye.
Wales ayaa dooneysa iyadana inay iska deyso magacooda luqada Ingariiska oo ay la baxdo magacooda luqada Welshka oo noqonaya Cymru.
