Xulka qaranka England ayaa ka walaacsan xaaladda dhaawaca weeraryahankooda Harry Kane oo ay waxyeello kasoo gaadhay ciyaartii Iran ay 6-2 ku xasuuqeen Isniintii, taas oo uu qaybtii dambe ka baxay garoonka markii uu sii wadan kari waayey ciyaarta.
Tababare Gareth Southgate ayaa beddelay Kane markii uu kuraanta wax ka noqday, waxaana sawirro laga qaaday ay muujinayaan in aanu ciyaari karayn kulanka Jimcaha ay wada ciyaarayaan waddanka Maraykanka.
Kane oo garoonka ka baxay iyadoo uu xanuun badan ka dareemayo kuraanta lugta midig, ayaa waxa uu sidoo kale awoodi waayey in uu tababarka la qaato ciyaartoydiisa Salaasadii, waxaana loo qaaday dhakhtarka oo sawirro ka qaaday, si loo ogaado heerka uu gaadhsiisan yahay dhaawaciisu.
Warbaahinta Ingiriiska ayaa kusoo warramaysa in Harry Kane aanu qayb ka noqon doonin ciyaarta Maraykanka, hase yeeshee tababare Gareth Southgate ayaa laga sugayaa inuu xogta u dambaysa la wadaago saxaafadda maalinta Khamiista.
Harry Kane ayaa labadii sannadood ee ugu dambeeyey ay dhaawacyo kala duwan kasoo gaadheen kuraanta lugta midig ee uu haddana dhaawaca cusub kasoo gaadhay, waana sababta keentay in laga walaaco inuu taam u noqonayo kulamada ka hadhsan Koobka Adduunka.
Xulka qaranka England ayaa si aad ah ugu tiirsan Harry Kane oo laba gool caawiyey kulankii Iran, isaga oo ah hoggaamiyahooda afka hore iyo ciyaartoyga ugu magaca weyn ee ay la tageen Koobka Adduunka, waxaana haddii uu saddex gool dhaliyo inta uu socdo Koobka Adduunku uu jabin doonaa rikoodhkii gool-dhalinta Wayne Rooney ee xulka England.
76 ciyaarood oo uu Harry Kane u saftay xulka qaranka England ayuu u dhaliyey 51 gool, waxaana kaliya ka horreeya Wayne Rooney oo 54 gool u saxeexay.
