Tababaraha xulka qaranka England ee Gareth Southgate waxa uu durba bilaabay daraasaynta sidii uu ku heli lahaa farsamo iyo xeelado uu ku joojiyo xiddiga xulka qaranka France ee Kylian Mbappe kaddib markii ay labada xul ee England iyo France isku dhaceen wareegga siddeedda Koobka Adduunka.
Kylian Mbappe oo laba gool dhaliyey kulankii Poland ee wareegga siddeedda ayaa ah hoggaamiyaha dhabta ah ee xulka difaacanaya Koobka Adduunka ee Faransiiska, waxaana afartii ciyaarood ee uu dheelay uu dhaliyey shan gool.
Difaaca England ayay waqti badan ku qaadan doontaa inay fahmaan qaab-ciyaareedka Mbappe ka hor inta aan la gaadhin waqtiga ciyaarta, waxaana hubaal ah in uu Gareth Southgate meel la fadhiisan doono ciyaartoydiisa oo uu u sharrixi doono qaabka dhaqaaqa Mbappe, meelaha uu ka yimaaddo iyo xataa go’aamada uu qaato marka uu kubadda lasoo galo xerada ganaaxa.
Halyeygii difaaca midig ee England iyo Manchester United ee Gary Neville ayaa isku dayaya inuu caawiyo Gareth Southgate, waxaanu u sheegay sida loo joojin karayo Mbappe, waxaanu yidhi: “Kylan Mbappe ayaa calaamadsan doona. Mbappe waa ciyaartoy cajiib ah, waana laacibka cusub ee ugu wanaagsan dunida, sababtoo ah Messi iyo Cristiano Ronaldo waqtigoodu wuu soo dhamaanayaa. Mbappe waa burburiye dhab ah, laakiin Kyle ayaa ku dhowaan doona, waanu ka orod badan yahay difaacyahannada reer Poland, laakiin run ahaantii waa ciyaartoy heersare ah.”
Neville waxa kale oo uu u sheegay Gareth Southgate in loo baahan yahay in la jaro qaabka wada-xidhiidhka iyo kubbadaha ay Antoine Griezmann iyo Olivier Giroud u dhiibaan Mbappe, taasina keeni doonto inuu go’doon noqdo.
Dhinaca kale, Roy Keane oo isaguna istuudiyaha la fadhiyey Gary Nevile ayaa yidhi: “Macquul ma aha in la joojiyo Mbappe, laakiin waxa aan kula talinayaa xulka England in ay iyaguna weerarkooda isticmaalaan, lagu xidho ciyaartoy kale oo aan la siinin meel uu firaaqo ka helo.”
