Xulka qaranka England ayaa wadnaha farta ku haya, waxaanay kasii walaacsan yihiin sida ay noqon doonto xaaladdoodu wareegga 16ka Koobka Adduunka, kaddib bandhiggii liitay ee Jimcihii ay barbarraha goolal la’aanta ah kula galeen Maraykanka.
England oo guul weyn oo 6-2 ah oo ay ka gaadhay Iran ku furatay Koobka Adduunka ayaa qaab ciyaareed liita la timid kulankii Maraykanka, waxaanay nasiib ku lahaayeen haddii aanay guul-darro la kulmin.
Tababare Gareth Southgate ayaa hadda uu xulka qarankiisu aad u walaacsan yahay, waxaanay ogaadeen suurtogalnimada ah in wareegga 16ka ay u badan tahay inay isku dhacaan waddanka Holland oo iyaguna xalay barbarro la galay Ecuador.
Kulanka ugu dambeeya group B waxa England ay la ciyaari doontaa Wales oo hal dhibic oo kaliya haysata, halka Iran oo saddex dhibcood wadata ay waajihi doonto Maraykanka oo laba dhibcood ka helay labadii ciyaarood ee uu dheelay.
Baqasho kama hayso England inay ka hadho Koobka Adduunka, sababtoo ah kaliya waxay ku hadhi karaan in lagaga badiyo 4-0, waana wax aan macquul ahayn, hase yeeshee natiijada kulamada u hadhsan group B waxay saamayn ku yeelan doonaan sida ay iskugu dhici doonaan labada waddan ee kasoo gudba group A.
Haddii England ay ku guul-darraysato inay kaalinta koowaad kaga soo baxdo Group B, waxay isku dhici doonaan dalka kaalinta koowaad kaga soo gudba group A oo ay u badan tahay inay noqon doonto Holland maadaama ay afar dhibcood haysato oo ay hore uga soo adkaatay Senegal, sidoo kalenaa barbarro laa gashay Ecuador, waxaana ciyaartooda u hadhsan ay la dheeli doonaan Qatar oo ka hadhay Koobka Adduunka.
England ayaa iyaduna waxay la dheeli doontaa Wales, haddii ay guul-darraysato ama barbarrayso oo ay Iran ka adkaato Maraykanka, waxay England kusoo bixi doontaa kaalinta labaad, sidaas ayaanay ugu dhici doontaa Holland.
Wargeyska The Sun ayaa sheegay, in England ay hadda aad uga walaacsan tahay in ay Holland isku dhacaan wareegga 16ka, iyadoo la ogyahay in sannadkii 1992kii ahy labadan dal ku kulmeen Koobka Adduunka.
