Ka hor maanta, Sacuudi Areebiya waxay badisay kaliya kaliya afar kulan oo Koobka Adduunka iyadoo labo ka mid ah ay badiyeen sannadkii 1994kii – waana marka kaliya ee ay gaareen wareega bug baxda.
Guushii maanta waa guushoodii labaad ee 28kii sannadood ee ugu danbeysay, waana guushoodii ugu weyneyd abid. Hore waxay u soo garaaceen Morocco iyo Belgium Koobkii Adduunka 1994, waxay sidoo kale afar sannadood ka hor ka badiyeen Masar.
Laakiin inay garaacaan Argentina oo loo arkayay xulka ugu cadcad Koobka Adduunka, waxay noqon doontaa lama filaankii ugu weynaa Koobka Adduunka iyo waqtigii ugu fiicnaa abid taariikhda kubada cagta Sacuudiga.
Lionel Messi ayaa ah ciyaaryahankii ugu horeeyay ee afar Koob Adduun oo kala duwan gool u dhaliya Argentina (2006, 2014, 2018, 2022) wuxuu kala wareegay rikoodhkaan Gabriel Omar Batistuta (94, 98, 02) iyo Diego Maradona (82, 86, 94).
Sidoo kale Lionel Messi waa ciyaaryahankii shanaad ee afar Koob Adduun oo kala duwan gool ka dhaliya ka dib Pelé, Uwe Seeler, Miroslav Klose iyo Cristiano Ronaldo.
Argentina ayaa la jabiyay rikoodhkeedii guuldarro la’aanta oo soo jiitamayay 26 kulan, markii ugu danbeysay ee laga badiyo waxay aheyd July 2019kii.
Sidoo kale waa markii labaad taariikhdooda ee laga badiyo kulan Koob Adduun iyagoo hogaaminaya qeybta hore, waxaa sidaan oo kale ku sameysay Uruguay sannadkii la bilaabay Koobka Adduunka ee 1930kii.
Xulka Sacuudiga ayaa noqday xulkii ugu horeeyay ee Qaarada Aasiya ee ka badiya xulka Argentina Koobka Adduunka, ka dib shan jeer oo ay isku dayeen. Waana xulkii ugu horeeyay ee aan Yurub ka dhisneyn oo ka badiya Argentina tan iyo markii ay Cameroon sidaas sameysay sannadkii 1990kii.
Seddexdii xul ee ugu danbeysay ee Argentina ku garaaca Koobka Adduunka waxay noqdeen kuwa ku guuleystay tartanka (Germany 2014 iyo France 2018) ama gaara finalka (Croatia 2018).
