Sannad iyo badh waqti dheer ayuu ku yahay kubadda cagta, gaar ahaan Burno Fernandes iyo xulka qarankiisa Portugal. June 2021, tababare Fernando Santos ayaa kaydka dhigay Bruno Fernandes kulankii Belgium ee wareegga 16ka Euro 2021, balse kama aanay faa’iidin waxaana lagu garaacay 1-0 iyaga oo sidaas kaga hadhay tartankaas.
Wax walba way isbaddaleen hadda, waxaana yimid Koobka Adduunka oo uu tababare Santos mar kale u diyaariyey xulkiisa oo usoo gudbay wareegga 16ka, waxaana caawa ay Switzerland ku dagaallami doonaan garoonka Lusail Stadium.
Santos kuma celin karo qaladkii uu sameeyey sannad iyo badh ka hor, sidoo kalena waa inuu saxo waxyaabihii ka qaldanaa kulankii South Korea ee ay guul-darraysteen ee ugu dambeeyey wareeggii group-yada Koobka Adduunka ee toddobaadkii hore.
Cristiano Ronaldo, Bernardo Silva, Joao Felix, Ruben Dias iyo Joao Cancelo ayaa dhamaantood diyaar u ah ciyaartan, iyaga oo kula adii horena si joogto ah ugu soo bilowday, balse Santos waxa uu ogyahay in haddii uu doonayo in dalkiisu uu gaadho ugu yaraan halkii ay tageen 2006 oo ahayd semi-finalka, in uu hoggaamiyaha xulka ka dhigo Bruno Fernandes.
Portugal oo aan waligood ku guuleysanin Koobka Adduunka, waxay hadda su’aashu ay tahay waa kuma xiddiga ugu wanaagsan ee ay haystaan iyadoo ka sokow xiddigaha sare ku sugan ee Bernardo Silva, Cancelo, Felix, Ronaldo iyo Dias uu joogo Rafael Leao oo aan la qaban karayn, isla markaana ciyaartii Uruguay isaga oo beddel ku yimid shabaqa la saaxiibay.
Sida ay muujinayso xogta laga diiwaangeliyey kulamadii xulka Portugal uu ciyaaray Koobka Adduunka, waxa xiddigooda ugu fiican illaa hadda uu yahay Bruno Fernandes oo dhaliyey labadii gool ee ay ku garaaceen Uruguay oo midkood uu ku dooday Ronaldo balse FIFA iyo VAR ay intudba caddeeyeen in aanu kubadda taabanin oo sidaas loogu qoray Bruno Fernandes.
