Xiddig khadka dhexe ee Arsenal ee Granit Xhaka ayaa laga qaadi doonaa kabtannimada, sidoo kalena waxa uu waajihi doonaa ganaax kaga iman doona FIFA, kaddib markii uu sameeyey ficil aan habboonayn kulankii Serbia.
Xhaka oo ay da’diisu tahay 30 jir ayaa ahaa kabtanka xulkiisa Switzerland ee Koobkii Adduunka ee ay wareegga 16ka kaga hadheen, iyadoo Portugal ay ku xasuuqday 6-1.
FIFA ayaa ganacanta ku haysa baadhitaan lgu samaynayo Granit Xhaka oo lagu haysto ficilladiisii kulankii ay Serbia 3-2 kaga badiyeen ee wareeggii group-yada, markaas oo uu Xhaka ka cadhaysiiyey ciyaartoyda kaydka fadhiday ee Serbia oo uu hortooda tegay isaga oo xiniinyaha is-haya.
Falkaas ayaa waxa uu keenay in dhawr ciyaartoy oo reer Serbia ah oo kaydka fadhiyey ay dagaal ugu soo kacaan laacibkan, iyadoo garsooruhuna uu kaadh digniin ah siiyey.
Xhaka ayaa sidoo kale ku lug yeeshay fal kale oo dhaqan xumo ah oo ka dhacay garoonka, waxaana la arkay isaga oo xidhan shaadh uu dhabarka kaga qoran yahay ‘Jashari’, kaas oo markii la weydiiyey macnaha uu kaliya ku sheegay in aanu magacaasi wax lug ah ku lahayn siyaasad, balse uu yahay magaca xiddiga xulkiisa Switzerland ee Ardon Jashari.
Markii baadhitaan la sameeyey ayaa waxa la ogaaday in Jashari uu yahay magaca ninkii aas-aasay jabhaddii Kosovo Liberation Armay ee dagaalkii Kosovo ee ay reer Albania ku doonayeen inay kaga go’aan Yugoslavia.
Arrinta layaabka leh ayaa waxay tahay in Shaqiri oo ay xulka Switzerland u wada ciyaaraan Xhaka in uu kasoo jeedo qowmiyadda Albanian-ka ee reer Kosovo ee sannadkii 2008 markii ay xornimadooda qaateen la baxay Serbia.
Si kastaba, FIFA ayaa la filayaa in ay ganaax ku riddo Granit Xhaka, sidoo kalena xidhiidhka kubadda cagta Switzerland ayaa la sheegay inay ka xayuubin doonaan kabtanimada.
