Manchester United ayaa digniin kama dambays ah siisay xiddig ku dhibaatoonaya Old Trafford oo uu muddo laba sannadood iyo dheeraad ah la qabsan la’yahay, waxaana loo sheegay in kaliya fursad loo siinayo muddo saddex bilood ah oo uu ku badbaadsado mustaqbalkiisa.
Tababare Erik ten Hag ayaa ogolaaday in xilli ciyaareedkan uu isku dayo inuu kalsoonida u dhiso oo uu dib ugu soo celiyo qaab-ciyaareedkiisa xiddiga khadka dhexe ee reer Netherlands ee Donny van de Beek oo uu hore ugu soo layliyey Ajax, laakiin sannadkii 2020 ay Man United kasoo iibsatay.
Ten Hag ayaa markii uu yimid Old Trafford xagaagii waxa uu dib usoo celiyey Van de Beek oo amaah ku maqnaa xilli ciyaareedkii tegay, balse haddana laacibkan ayaa dhawr ciyaarood oo la safay aan la imanin qaab-ciyaareed qancin kara macallinka ay isku waddanka yihiin.
Michael Silvestre oo difaaca uga ciyaari jiray Arsenal ayaa waxa uu sheegay, in kubbad-sameeyahan ay Red Devils kasoo bixisay £40 milyan oo Gini uu kaliya fursad u haysto inta ka hadhay xilli ciyaareedkan, haddii uu is-muujin waayana uu sidaa kusoo dhamaanayo waqtigiisa Old Trafford.
“Nasiib-darro wax isbeddel ah kuma arkayno Donny van de Beek.” Ayuu yidhi Silvester oo kusii daray: “Waa run ma aanu helin fursado badan oo uu ciyaarta ugu soo bilowdo, laakiin haddana ma aragno ciyaartoygoii aynu ku naqaanay Ajax. Haddii aanu isku muujin shanta illaa lixda bilood ee soo socda ee illaa dhamaadka xilli ciyaareedkan, waxa iman doona isbeddel.”
