Tababaraha kooxda kubadda cagta Barcelona ee Xavi Hernandez ayaa saadaaliyey labada xul ee iskugu iman doona finalka Koobka Adduunka ee ka socda waddanka Qatar ee wareeggiisa 16ka caawa lasoo gabogabaynayo iyo sidoo kale labada naadi ee iskugu imanaya finalka Champions League ee xilli-ciyaareedkan 2022-23.
Koobka Adduunka oo uu difaacanayo xulka qaranka France ayaa waxa wareegga siddeedda isku dhacay dalal waaweyn, sida France vs England, Brazil vs Croatia, Argentina vs Holland, iyo xulalka caawa soo gudba oo iyaguna isku dhici doona.
Xavi Hernandez oo ku sugan waddanka Qatar oo uu ka daawanayo Koobka Adduunka, ayaa ka tegi doona maalmaha soo socda, si uu kooxdiisa ula bilaabo tababarka isku-diyaarinta xilli ciyaareedka, iyadoo xiddigaha aan loo qaadanin Koobka Adduunku ay bilaabi doonaan tababarka.
Xavi oo la weydiiyey labada xul ee iskugu soo bixi doona finalka Koobka Adduunka, waxaanu ku jawaabay: “Saadaashayda finalka Koobka Adduunka? Waa Brazil vs Spain.”
Xulka Spain ee uu Xavi saadaaliyey inuu finalka tegayo ayaa waxay caawa la dheelayaan Morocco, haddii ay soo dhaafaanna waxay wareegga siddeedda ku dhacayaan Portugal ama Switzerland midkooda soo gudba. Haddii nasiibkoodu fiicnaado oo ay semi-finalka yimaaddaan, waxay la ciyaari doonaan England iyo France midkooda soo gubba.
Sidoo kale, Brazil oo xalay u gudubtay wareegga siddeedda markii ay ka adkaatay South Korea ayaa waxay ku dhacday Croatia, haddii ay dhaaftana waxay is-haleeli doonaan Argentina & Holland midkooda soo baxa, ka hor inta aan la go’aamin cidda tegaysa finalka.
