Tababaraha kooxda kubadda cagta Barcelona ee Xavi Hernandez ayaa magacaabay xulalalka ay la tahay in midkood ay ku guuleysanayaan Koobka Adduunk,a isaga oo dhinaca kalena soo bandhigay fursadaha uu helayo xulka qarankiisa Spain ee sannadkan aan ku jirin dalalka sida aadka ah loo hadal hayo.
Xavi Hernandez ayaa kalmaddiisa ku darsadaya saadaasha Koobka Adduunka ee indhaha dunida oo dhan kusii jeedaan, waxaana uu sheegay in midkood uu ku guuleysan doono xulka qaranka Argentina ee maanta guul-darrada xanuunka kulul kala kulmay Sucuudiga iyo Brazil oo aan wali ciyaarin.
“Saadaashu way isbeddellaysaa, wax walbana way is rog-rogayaan laakiin aniga waxa ii muuqata in Brazil iyo Argentina ay hal tallaabo ka horreeyaan dalalka Yurub.” Ayuu hadalkiisa ku bilaabay.
Waxa uu Xavi Hernandez sharraxay sababta uu ugu nisbaynayo in Brazil iyo Argentina ay midkood ku guuleysan doono, waxaana uu yidhi: “Waxay haystaan Neymar iyo Messi oo aad u wanaagsan. Balse waxa iyaguna jooga oo ku guuleysan karaya France, Spain, Portugal, England, Germany, Belgium iyo Croatia.”
Mar la weydiiyey rajada xulka qaranka Spain, waxa uu ku jawaabay: “Rajo ayaan leeyahay. Luis Enrique waxa uu dhisay koox aad u wanaagsan, waana tababare fiican. Waa macallinka ku habboon Spain sababtoo ah shaqsiyaddiisa, waana in aad aaminto kooxdaada. Anigu niyad-samaan badan ayaan ku qabaa Spain.”
Waxa kale oo uu Xavi amaanay ciyaartoyda xulka qaranka Spain, waxaanu yidhi: “Waxay ku ciyaari doonaan shaqsiyad, cadaadis sare, kubbad-hayn iyo kubbad toosan. Waxay haystaan ciyaartooyo da’yar iyo ruug-caddaayo isku badhxan, sida Busquets, Alba iyo Koke. Ma ahaa koox fudud, ciyaarta koowaadna waxay muhiim u noqon doontaa mustaqbalka tartanka. Guul ay gaadhaan wax badan ayay horseedi doontaa.”
