Kooxda kubadda cagta Barcelona ayaa doonaysa inay la saxeexato ciyaartoy Yuhuudi ah oo uu dalbaday tababare Xavi Hernandez in loo keeno suuqa iibka ciyaartoyda ee bishan January, kaas oo haddii ay waqtiga saxeexiisa ku guuleysan waayaanna ay mar kale ku rogaal-celin doonaan xagaaga.
Xavi Hernandez ayaa la dhacsan qaab-ciyaareedka Oscar Gloukh oo khadka dhexe uga dheela kooxda Mccabi Tel Aviv ee ka dhisan caasimadda awaddanka Israel.
Oscar Gloukh ayaa la sheegay inay danaynayaan kooxo badan oo reer Yurub ah, laakiin ay Barcelona tahay koxoda ugu cadcad saxeexa laacibkan.
Wargeyska ONE ee kasoo baxa Israel ayaa maanta boggiisa hore ku qoray, in Barcelona ay la xidhiidhay Oscar Gloukh oo ay diyaarinayso dalab rasmi ah oo ay usoo bandhigto kooxdiisa Maccabi Tel Aviv, inkasta oo aan si rasmi ah loo shaacin qiimaha ay ku doonayaan.
Warka ayaa intaa ku daray, in 18 jirkan ay Barcelona ay la socotay illaa bilowgii xilli ciyaareedkan, haddana ay diyaarinayaan dalabkii ay ka agudbin lahaayeen.
PSV Eindhoven, Ajax iyo Feyenoord ayaa la sheegay in ay dhamaantood danaynayaan Oscar Gloukh oo ka ciyaara booska No.10, balse sidoo kale ay kooxaha Faransiiska ee Marseille iyo AS Monaco ay iyaguna saxeexiisa doonayaan.
Borussia Dortmund ayaa iyaduna ala socotay laacibkan illaa yaraantiisii, sidoo kalena Tottenham ayaa la rumaysan yahay inay si dhow ula socoto korriinkiisa.
Si kastaba ha ahaatee, warbaahinta Israel ayaa sheegtay in Oscar Gloukh lagu heli karayo 7 milyan oo Euro.
