Xalay ayay ahayd markii uu qarxay warka sheegaya in kabtanka Man United ee Harry Maguire uu ku dhaw yahay inuu ku biiro kooxda Aston Villa.
Daafacaas ayaa Sabtidii lagu sawiray meel laga cunteeyo oo ku dhaw gegida Aston Villa taas oo dhalisay in degdeg loola xidhiidhiyo kooxdaas.
Tababare Erik Ten Hag ayaa durba isbedelo waaweyn ka sameeyay qolka labiska Man United balse haatan ma gaadhin go’aanka ah inuu 29 sano jirka ree England fasaxo isagoo u haysta ugu yaraan kaabis boosaska daafaca dhexe ah.
Saxafi Fabrizio Romano ayaa sheegay inaysan gabi ahaanba waxba ka jirin wararkii sheegayay in Maguire ku dhaw yahay Aston Villa isla markaana ay labada dhinacba beeniyeen xogtaas.
Maguire ayaa eedaymo badan kula soo kulmay bandhigyadiisii Man United ee 18-kii bilood ee ugu dambeeyay balse markale isku soo muujiyay xulka England Koobkii aduunka.
Si kastaba, Harry ayaan u dhawayn inuu jabiyo lamaanaha daafaca dhexe ee kooxdiisa ee Raphael Varane iyo Lisandro Martinez iyadoo xataa Luke Shaw haatan xulashada daafaca dhexe kaga horreeyo.
Aston Villa ayaa aad u wanaagsan tan iyo magacaabistii tababare Unai Emery iyagoo booska 11-aad ee kala sarreynta Premier League soo fadhiistay xilli ay kaalmaha lagu dhaadhaco ku jireen wakhtigii Steven Gerrard.
