Tababaraha xulka qaranka France ee Didier Deschamps ayaa canaan kula dul-dhacay mid ka mid ah xiddigaha dalkiisa oo illoobay sharciga kubadda cagta, isla markaana waxyaabo mamnuuc ah lasoo galay garoonka ciyaartii xulka qaranka Poland ay 3-1 ku garaaaceen Axaddii.
Didier Deschamps ayaa ka cadhooday difaaca xulkiisa ee Jules Kounde markii uu garsooraha dhexe ee ciyaartu ku amray inuu dibedda uga baxo garoonka oo uu iska saaro silsilad dahab ah oo uu qoorta ku xidhnaa, taas oo ah arrin mamnuuc ah oo aan loo ogolayn inay ciyaartoydu la yimaaddaan garoomada.
Daqiiqaddii 42aad ayuu garsoore Valenzuela Saez garoonka ka saaray laacibkan, isaga oo ku amray inuu bixiyo silsiladda qoorta ugu jirta, waxaana la arkayay iyadoo mid ka mid ah shaqaalaha tababarka xulku uu caawinayo oo uu ka furayo silsiladda.
Difaaca Barcelona ayaan ka hadal sababta uu silsiladda dahabka ah usoo xidhay iyadoo lagu jiro ciyaar dagaal ah, balse Didier Deschamps ayaa arrintan aad uga cadhooday, waxaana isaga oo la hadlayay saxaafadda ciyaarta kaddib uu yidhi: “Xaq uma laha [inuu soo xidho silsilad]. Anigu ma garanayo waxa ugu dhax jiray silsiladda, balse waxa aan ogahay in Jules uu sameeyo waxyaabo khuraafaad ah marka uu tababarka joogo.
“Ma garanayo macnaha ka dambeeya, xataa waxa aan u sheegay ‘nasiib ayaad leedahay maadaama aanad aniga hortayda joogin, haddii kale waan ku….’
“Garsooruhu ciyaarta kaddib ayuu ii sheegay in aan la ogolayn in ciyaartoydu xidhaan silsilad. Sidoo kalena looma ogola inay xidhaan oo ay garoonka lasoo galaan saacado ama muraayadda indhaha ama ookiyaale.”
