Tababaraha Chelsea ayaa xaqiijiyey, in uu muddo dheer maqnaan doono ciyaartoy kale oo ka dhaawacmay kooxdiisa, kaas oo aanu muddo bil iyo dheeraad ah ku xisaabtami doonin.
Liiska ciyaartoyda Chelsea ayaa sii dheeraanaya waxaana hore u jiifay N’Golo Kante, Wesley Fofana, Reece James Ben Chilwell, Armando Broja, Raheem Sterling, Eoudard Mendy, Christian Pulisc iyo Ruben Loftus-Cheek, waxaana hadda liiskaas ku biiray laacibka khadka dhexe ee Denis Zakaria.
Xiddigan ay Blues amaahda kaga soo qaadatay Juventus ayaa waxa soo gaadhay dhaawac muruqa ah ciyaartii Khamiistii ee Fulham, waxana uu jiifi doonaa muddo afar toddobaad ah.
Denis Zakaria oo ay da’diisu tahay 26 jir ayaa garoonka ka baxay daqiiqaddii 26aad, waxaana baadhitaannada lagu sameeyey ay xaqiijiyeen in aanu garoomada kusoo laaban doonin muddo afar usbuuc ah.
Graham Potter oo saxaafadda la hadlayay ayaa yidhi: “Denis afar toddobaad ayuu maqnaan doonaa, taasina jug weyn bay nagu tahay.
“Waxa aan rajaynayaa in uu si degdeg ah noogu soo laaban doono.”
Zakaria ayaa toddoba kulan u saftay Chelsea, waxaanaydhamaantood yihiin intii uu joogay tababare Grahm Potter oo usbuucyadii ugu dambeeyey kalsooni badan siinayay.
Maqnaanshaha Denis Zakaria ayaa dhibaato weyn ku ah Chelsea oo kaalinta tobnaad kaga jirta miiska kala-sarraynta horyaalka Premier League, isla markaana usbuuca soo socda la ciyaaraysa Liverpool oo ay isku dhibco yihiin, kuna jirta kaalinta sagaalaad.
