Dad badan lama socdaan qisada dhabta ah ee Gabriel Martinelli ee Manchester United iyo sidii uu ugu fashilmay tababarkii lagu tijaabiyey ee sababta u noqday in Red Devils ay dibedda usoo tuurto, ka hor intii aanu saldhigin Arsenal oo uu ka noqday xiddig weyn oo ay kubaddiisu kusoo baxday.
Xiddiga reer Brazil ee Gabriel Martinelli ayaa helay helay fursado uu kaga soo muuqdo garoomada tababarka ee kooxaha Manchester United iyo Barcelona oo uu dharkooda ku labbistay, laakiin labadaba si niyad-jab ah ayuu kaga laabtay.
21 jirkan oo hadda ka mid ah xulka qaranka Brazil ee ku sugan waddanka Qatar ee ka qayb-gelaya Koobka Adduunka, ayay Arsenal sannadkii 2019 kasoo iibsatay kooxda heerka afraad ee Brazil ee Ituano, iyada oo kasoo bixisay £6 milyan oo Gini.
Mikel Arteta ayaa kalsooni buuxda u muujiyey oo xilli ciyaareedkanna ka dhigay ciyaartoy aanu booskiisu muran gelin, waxaana 14 ciyaarood oo uu u saftay uu u dhaliyey shan gool iyo laba uu caawiyey, taas oo keentay in lagu daro xulka qaranka Brazil.
Waraysi uu siiyey warbaahinta sannadkii 2019 ayuu ku sheegay inuu tegay garoomada tababarka Manchester United iyo sidoo kale Barcelona, waxaanu yidhi: “Waxa tijaabo ku tegay Manchester United, balse iima shaqayn, afar ama shan jeer ayaan tababarka la qaatay. Waxa joogay ciyaartooyo reer Brazil oo aan arkay, waxayna la kulmeen aabbahay si aan u joogo.
“Ciiyaartoyda aan Manchester United kula kulmay waxa ka mid ahaa Paul Pogba iyo Zltan Ibrahimovic, waxay ahayd markii saddexaad ama afraad ee aan isku dayay. Waxa aan ahaa 17 jir markii ugu dambaysay ee aan tegay Manchester, kaddibna waxa aan ku laabtay Brazil markii ay ii shaqayn weyday.”
Gabriel Martinelli waxa sidoo kale uu tababarka la qaatay ciyaartoyda da’yarta Barcelona oo uu ugu tegay kulliyadda La Masia, waxaana ciyaartoyda ay tababarka wada qaateen ka mid ahaa Ansu Fati muddo 15 maalmood ahayd oo uu joogay Spain.
