Khadka dhexe ee kooxda Manchester United ee Casemiro oo kamid ahaa xiddigaha xagaagii Old Trafford usoo wareegay ayaa ka hadlay sida uu ula dhacay weeraryahanka kooxdiisa ee Marcus Rashford.
Rashford ayaa dhaliyay goolkii ay Man United guusha kaga soo gaadhay Wolves shalay kaddib markii marka hore ciyaarta keydka loo dhigay sababo anshax-marin.
Rashford ayaa si cajiib ah uga jawaabay keydka uu tababare Ten Hag dhigay isagoo goolkiisii 11-aad ee xilli ciyaareedka ka dhaliyay daqiiqadii 76-aad ee kulankaasi.
Casemiro qudhiisa ayaa kamid ahaa xiddigaha markale shalay wacdaraha dhigay isagoo sameeyay taakooyinkii (Tackle) ugu badnaa ciyaartaas.
Casemiro oo kulanka kaddib ESPN Brazil la hadlay ayaa sheegay in Rashford uusan ka filayn inuu sidan oo dhan u fiican yahay isla markaana uu shanta xiddig ee aduunka ugu fiican kamid noqon karo.
“Si aad u daacad ah ayaan kuula hadlayaa, anigu dhab ahaan waan la yaabay ciyaartoyga uu Rashford yahay. Aniga aragtidayda, gaar ahaan inaan yaqaano isaga sidoo kale marka aan garoonka lagu jirin, haddii uu si wanaagsan sameeyo wuxuu noqon karaa shanta ciyaartoy ee dunida ugu fiican”.
