Kabtankii hore ee xulka qaranka England ee Wayne Rooney ayaa daboolka ka qaaday booska uu cabsida ugu weyn ka qabo ee dalkiisu ka jabi karo koobka aduunka.
37 sano jirka ah tababaraha kooxda DC United ayaa ah gool dhaliyaha ugu sarreeya taariikhda xulkaas isagoo 53 gool ku haysta rekoodhkaas.
Waxa uu qayb ka ahaa jiilkii dahabiga ahaa ee caanka ahaa ee England kuwaas oo ku fashilmay inay wax koob ah usoo hooyaan dalkooda.
Rooney oo saddex koob aduun kusoo metelay England ayaa qaba in xiddigaha haatan ee xulku ay durba sameeyeen wax ay awoodi waayeen isaga iyo ciyaartoydii ay isku jiilka ahaayeen.
Si kastaba, Wayne oo ku aragti dhiibanayay wargeyska The Times ayaa sheegay in booska daafaca dhexe yahay midka uu werwerka ugu weyn uga qabo England.
“England waxay haystaa mid kamida haddiiba uusan ahayn safka ugu xoogan, daafacyada garbaha, khadadka dhexe iyo weeraryahanada” ayuu yidhi Rooney.
“Booska kaliya ee aan u xooganayn sida dalalka kale ayaa ah daafaca dhexe, hore waxaanu u haysanay ciyaartoy ay kamid yihiin Rio Ferdinand iyo John Terry oo heer caalami ahaa”.
“Marka aad eegto Raheem Sterling, Harry Kane, Phil Foden, Jack Grealish, Bukayo Saka..waa kuwo u fiican sida kuwii aanu haysanay”.
